Kontzertua Euskal Herrian dagoen txistulari talde profesional ia bakanenetakoa denak hasiko du Eguberriei eskainitako lau obra laburrekin, Jose Ignazio Ansorena Miner-en zuzendaritzapean: Urte Berri goiza (Jose Ansorena Eleizegi), Baserrietako olerki ituna (Luis Iruarrizaga), Bilantzikoa (Jose Ignazio Ansorena) eta Erregeak datoz (herri doinuak/Jose Ignazio Ansorena).
Segidan, Marta Uruñuelak zuzendutako Agorreta Musika Eskolako kantariak gehituko zaizkie elkarrekin hiru kanta herrikoi abesteko: Xarmengarria eta Uso zuria (Xabier Sarasola) eta Suhar (Juan Carlos Irizar). Kontzertuaren zati handiena Ion Irazokik zuzendutako Mendi Abesbatzak eta Donostiako Txistulari Taldeak elkarrekin emanen dute. Urtero egin legez, zati hau errepertorio berria aurkezteko baliatuko dute, Eguberri garaiari dagozkien kantei arreta berezia paratuz: Neskatx’ederra, Oñazez-Alduden gizonik ez edo Aritz adarrean herri abestiak eta La Navidad ya llegó (F. Moreno-Torroba Larregla). Eta noski, tartean guziontzat ezagun eta maiteak diren doinuak entzuteko parada izanen da, Birjiña Maite (Gotzon Aulestia) edo Sehaska Kanta (Klaudio Sagarzazu), erraterako.
Kontzertuaren sarrera doakoa izanen da. Aitzakiarik ez beraz, Donezteben musikarekin gozatzeko!