Herri baratzeen ekimena aurrera ateratzeko hilabete hauetan hainbat urrats eman behar izan dira: udal ordenantza sortu eta onartu, Nafarroako Gobernura igorri eta baimenak eskuratu, arkitektuak egindako memoria eta antolakuntza landu, erakusketa publikoa… Hau guztia egin ondoren, abuztuan udalak herri baratzerako lur eremua garbitu eta txukundu du eta neurketak eta seinalizazioak egin dira.
Herri baratzeen ordenantza
Ordenantza honen xedea Doneztebeko udal baratzeen kontzesioa eta erabilera arautuko dituzten xedapenak ezartzea da. Erabiltzaileek zein Udalak bete egin beharko dituzte xedapen horiek. Ordenantzaren barrenean honako puntu hauek jasotzen dira: aplikazio eremuak, eskumenak eta zaintza, kontzesio eta erabilerarako baimen araudia (baratzeen erabilera ematea, kontzesioa emateko baldintzak, eskaerak aurkezteko epea eta kontzesioa erabakiko duen organoa, baratzeen erabilera, mugak eta sarbideak bere horretan mantentzea, erabiltzaileek erabilerak bertzerentzea, aprobetxamendu-epea, kanona, fidantza, autoak erabiltzeko debekua, ureztatzeko uraren erabilera, baratzezaintza ekologikoa bultzatzea); erantzunkizunak, (kalteak eta galerak ordaintzea, kalteak konpontzea presazko egoeretan…) arau-hausteak eta kontzesioarekin bukatzeko arrazoiak.