Aresoarrak baino lau segundo gehiago behar izan zituen Eneko Saralegi leitzarrak (19.01). Laugarren postua Etxarri Aranatzeko Goizeder Beltzak eskuratu zuen (19.37) eta bosgarrena Dorraoko Ibai Resanok (19.57).
Lehen mailako Arpana Jaitsiera kanporaketa ere jokatuko zen. Batetik, Esteban eta Martin Pikabea (Gerendiain) aritu ziren, aurtengo lehen Mailako Arpana Txapelketan azkena sailkaturiko bikote. Bertzetik, Adrian Berruezo (Ibero) eta Alberto Oteiza (Larrageta). Hauek ezin izan zuten parte hartu txapelketan, lesio bat zela medio eta Doneztebeko aukera aprobetxatu zuten. Etzanda jarritako kanaerdiko enborrari 14 epai eta zutik jarritako kanaerdikoari 4 epai egiteko 8 minutu eta 29 segundo behar izan zituzten eta Pikabea anaiek 10 minutu ella 38 segundo. Beraz, Oteiza eta Berruezok mailari eutsi diote eta Pikabeatarrek bigarren mailan aritu beharko dute heldu den urtean.
Txapelketatik kanpo, jaialdia osatzeko asmoz, sei emakume aritu ziren aizkoran euren trebezia erakutsiz, bikotetan banatuak. Bikote bakoitzak lau enbor moztu zituen. Iturengo Maika Ariztegi eta Beintza-Labaiengo Irune Izkue izan ziren bizkorrenak (13.09), Aresoko Itxaso Onsalo eta Tolosako Alatzne Etxaburua bigarren (13.59) eta Berako Amaia Garcia eta Nerea Sorondo hirugarren (14.56).