Doneztebeko auroroek herritarrak, goizeko 9etan euren kantuekin esnatuta eta joaldunek lagunduta, hasierako ekitaldi ofiziala jantziko dute, Iñaki Dieguez akordeolariarekin eta udal agintariekin batera. Ondotik, herrian lau gune paratuko dituzte eta bertan musika bandak, dantza taldeak, txalapartak, joteroak, bertsolariak, abesbatzak baita erraldoien konpartsak ere ikusgai eta entzungai izanen dira. Egun osoan Nafarroako artisauen erakusketa izanen da. Txikiendako ere joko eremua jarriko da, adin guztiendako jendeari programa eskaintzeko. Akitzeko, Doneztebek lekukoa Erriberriko ordezkariei pasako die, heldu den urtean herri hartan folklore besta hau ospatuko baita.
Nafarroako Folklore Funtsak Nafarroako folklore adierazpen ezberdinen interes eta miresmena sustatzea du helburu nagusia, lau lan ildo bultzatuta: folklorearen kontserbazioa, formakuntza, difusioa eta sustapena. Ekimen honekin herriz herri ospatuko den besta honek tokian tokiko folklore aldaerak ezagutarazi nahi du, ahalik eta biztanle gehienetara ailegaraziz.