Sei hilabeteko epea zuten araztegi berria egiteko, baina azaroan hasi eta hiru hilabetetan lanak akitu eta martxan da. Inaugurazio ofizialik momentuz ez da izan, baina ezin baztertu norbait agertuko denik, hauteskundeak berehala izaki... Araztegiaren ezaugarriei dagokionez, Nilsak kontutan hartu zuen herri ttiki bat izatea, sistema sendoa izan behar zuela eta argi indarrarik gabe ari behar zuela, mantenimendua guttitzeko.
Hortaz, aukeratu den sistemak, ur zikinak garbitzeko bi dekantazio gune ditu, bakterio-ohatzea eta hezegune artifiziala. Lehen dekantaziotik pasatu eta gero, ura legarraz betetako ontzi batera ixurtzen da. Hor bakteria geruza bat osatzen da, ura garbitzen duena. Ondotik, bigarren dekantaziora pasatzen da eta azkenik hezegune artifizialera, non landareak haziko diren azkeneko garbialdia emateko urari.