Bidazi elkarteak eta Goiener enegia-kooperatibak, biek batera, energia eta elikadura jasangarriaren inguruko hitzaldia eskainiko dute martxoaren 6an, ortziralean 18:00etan Doneztebeko Kasinoan. Bertan, osagarri diren bi elkarte hauek elikadura eta energian dituzten alternatibak aurkeztuko dituzte, Malerreka osasuntsuago baten bila.
Goiener
Energia kooperatibek ekonomia iraunkorra garatzeko proiektu berriztagarrietan zuzenean inbertitzen dute. Horrela, subiranotasun energetikoa bultzatzen da, eta konpainia energetiko handiekiko independenteagoak izatea lortzen da. Energia, batik bat elektrikoa, egungo gizarteetako oinarrizko ondasun bilakatu da (ura edo elikagaiak bezain beharrezkoa). Energia kooperatiben xedea hiritarrek oinarrizko ondasun honekiko kontrola berreskuratzea da, honen garrantziaz jabetzea, energiaren kontsumo arduratsu eta iraunkorra bultzatuz.
Gure inguru honetan “GOIENER” kooperatiba dugu, 2012 urtetik honat, zerbitzu hau eskeintzen diguna. Irabazi asmorik gabeko kooperatiba izanik, elektrizitate berdea merkaturatuz lorturiko etekinak kooperatibara itzuliko dira berriz, eta bazkideek batzarretan erabakiko dute zertara bideratu diru horiek.
Era berean, bazkideek sorkuntza berriztagarriko egitasmoetan inbertitu ahal izango dute, kooperatibak berak kontsumituko lukeelarik ekoizpen hori. Azken helburua kooperatibak sorturiko energia kopurua, bazkideek kontsumitzen duten kopuru bera izatea da, hori guztia energia berriztagarrien bitartez eta ahalik eta kontsumo arrazional eta eraginkorrenean eginez.
Bidazi
Bidasoaldean hedatua den Bidazi elkartean, bertako baserritar, familia, ekoizle ttiki eta kontsumo taldeak elkartzen dira (300-400 herritar), haien osasunari garrantzia ematen diotelako eta eskualde hobe bat eraiki nahi dutelako, bertako ekonomia bultzatuz eta lanpostu duinak sortuz, lehenengo sektorea biziberrituz. Bidaziren filosofiaren ardatza kontsumo eta ekoizpen kontziente eta arduratsua da, eta horren inguruan bertze hainbat arlo ere ukitzen ditu: energia berriztagarriak, banka etikoak, hondakinen gestioa, bidezko merkataritza, software librea, hizkuntza ekologia… Izatez, “Bidazi”k hamar urte ditu, baina 2013ko udaberrian fase berritzaile batean sartu zen, eta 2014ko apiriletik bazkideek lokal bat dute Alkaiagan. Bertzelako eredu bat bultzatu eta jaten ikasteaz gain, modu demokratiko eta transparentean antolatzen den irabazi asmorik gabeko elkartean formazioa ere ematen dute, ikastaroen bidez (elikadura, kosmetika, energia....).
Informazio gehiago: www.bidazi.org / info@bidazi.org, edo sare sozialetan.