Gehienetan albisteak eta berriak bidaltzen ditugu ttipi-ttapara, herri bakoitzeko gaurkotasuneko kontuak, baina tarteka gure arbasoen aipamena ere egiten dugu. Ezkurra, herri berezia liburuan bilduak daude horietako asko, baina datu berriak ere sartuko ditugu noizbehinka, gaur egungo jarduerekin batera.
Honela, 1606ko martxoaren 29an udaletxea bildu zen, kontzejal eta juradoekin, ordenantza bat zehazteko, “ordenanza para el buen gobierno de la república de Ezcurra”. Horretarako, etxe bakoitzetik gizaseme batek joan behar izan zuen, ezkilen deiari erantzunez. Interes ekonomikoa nahiz etiko-erlijiosoa zuten bi gai zeuden eztabaidagai. Udaletxeak lanean segi ahal zezan, diru-sarrera nahiko izan behar zuen eta sarrera horiek basoaren aberastasunetik zetozen gehienbat. Beraz, ordenantza horietan udaletxearen baimenik gabe etxeak egiteko edo zaharberritzeko haritzak moztea debekatu zen. Isuna, udaletxearen eta salaketa jartzen zuen juradoaren artean banatuko zen, erdibana. Bordetarako taulak ere ezin zitezkeen egin, ezta sua ere belarra edo zuhaitzak zeuden tokietan. Herri-lurretan ezin zitekeen iratzerik moztu iraila bitarte eta aurrez udaletxeari baimena eskatu behar zitzaion. Benetan partikularrak zirela egiaztatu arte ezin zitekeen lur-eremurik hesitu. Edozein salmenta egiterakoan, produktuaren pisua eta neurria kontuan hartu behar zen, salmentaren zati bat udaletxeari ordaindu behar baizitzaion. Azkenik, elizkizunak ospatzen ziren bitartean ostatuan jolasean aritzen zirenen gehiegikeriak saihesteko, erabat galarazi zuten mezak irauten zuen bitartean jendea tabernan egotea. Tabernetako nagusiek herrikoak nahiz kanpotarrak aterarazi behar zituzten, bestela isuna ere jaso zezaketen. Garbi dago garai haietan udaletxeak eta elizak harreman handia zutela, ordenantzan halako gai erlijiosoa sartzeko.