Joan den astean epaitu zituzten Madrilen Igor Portu, Mattin Sarasola eta Mikel San Sebastian herritarrak. Fiskalak Barajasko T4ko atentatuan parte hartu izana egozten badie ere, hirurek lehen egunetik uko egin zioten deklaratzeari, Espainiako Auzitegi Nazionalak torturak ahalbidetzen dituela salatuz. «Ez dut auzitegi faxista hau ontzat ematen, eta ez dut deklaratuko», erran zion epaimahaiari Mattin Sarasolak. Igor Portuk epaiketa gelan azaldu beharko lituzkeenak tortura salaketan erran zituela adierazita egin zion uko deklaratzeari. Mikel San Sebastianek torturak ahalbidetzea leporatu zion Auzitegi Nazionalari. Lau eguneko epaiketaren ondotik, sententziaren zain gelditu da.
Epaiketa zela eta, joan den astean hainbat mobilizazio egin ziren herrian, batzarra astelehenean, elkarretaratzea asteazkenean eta larunbatean manifestazioa.
Tortura salaketa Iruñean
Bertze aldetik, apirilaren 30ean Iruñean egindako prentsaurrekoan, Bortzirietako zenbait kargu publikok eta herritarrek oroitarazi zuten Portuk eta Sarasolak torturatuak izan zirela salatu zutela 2008ko urtarrilean ustezko aitorpenak egin zituztenean. Josu Irazoki Berako alkateak salatu zuen Auzitegi Nazionala ez dela zilegizko epaitegia.
Zaine Rekondo lesakarrak gogorarazi zuen Joxe Arregiren heriotzatik gaurdaino milaka herritar torturatuak izan direla, «tortura ez baita nahigabean gutti batzuekin gertatzen den zerbait, Euskal Herrian sistematikoa da, maizegi izaten dugun egia gordina».
Barajasko T4ko atentatuan parte hartu izana egozten zaie, baina ustezko aitorpen horiek egin zituztenean torturak salatu zituzten
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun