VI. Plazaz Plaza Txapelketako finalaren errebantxa jokatuko dute Barrokalek (Oskozen ordez ariko da) eta Ruiz de Larramendik, Iturriaga leitzarraren eta Mendibururen kontra
Barrokal–O.R. Larramendi eta Iturriaga–Mendiburu izanen dira larunbatean 17:00etan hasiko den partidako protagonistak. Madrilgo Udalak eta Madrilgo Pilota Federazioak antolatutako egitarau berriak zortzi partida bilduko ditu urriaren 24an eta 25ean, eta larunbat arratsaldeko saioa emakumezkoen esku pilotari eskainita egongo da.
Hitzorduak esanahi berezia izaten jarraitzen du. Emakumezkoen esku pilota profesionala lehen aldiz iritsiko da Beti Jaiko kantxara, Ados Pilotak emakumezkoen pilota profesionalizatzeko eta agertoki berriak irekitzeko egiten ari den bidean beste urrats garrantzitsu bat emanez.
Beti Jai 1894an eraiki zen eta Madrilen zutik dirauen azken frontoi monumentala da. XIX. mendearen amaierako pilotaren historiaren lekuko izandako espazioan, gaur egungo emakume pilotari profesionalek euren lekua hartuko dute.