Jon Rekondo leitzarra hirugarren izan zen larunbatean Lekunberrin eta Txomin Amundarain eta Eneko Saralegi ere Doneztebeko ferietako finalean izanen dira
Ibai Soroak 17 minutu eta segundo bat behar izan zituen bi kanaerdiko, bi 60 ontzako eta oinbiko enborra mozteko. Iker Vicentek, berriz, 17 minutu eta bi segundo behar izan zituen. Bertze hiru txartelak eskuratzeko lehia ere estua izan zen. Jon Rekondo leitzarrak 18 minutu eta 50 segundo behar izan zituen hirugarren postua eskuratzeko, Arribeko Txomin Amundarain laugarren izan zen (18.59) eta Errazkingo Eneko Saralegi bosgarren (19.09). Finaletik kanpo gelditu ziren hiru Kañamarestarrak, Julen seigarren (19.23), Oier zazpigarren (19.56) eta Xuban zortzigarren (21.27). Kanporaketako bi azkenekoek, Oier Mitxelenak (23.28) eta Iban Resanok (23.40), bigarren mailan jokatu beharko dute datorren urtean.