Leitzan duela 100 urte gertatutako istorioa hartu dute oinarri antzezlanean. 1926an Hilario Olazaran musikagile eta fraile kaputxinoak, Leitzako Ingurutxoa ikusi zuen plazan, eta dantza honekin guztiz liluratuta liburu bat eskaini zion. Bertan, Ebaristo Elduayen txistulariari adituz, Ingurutxoko doinu guztiak partituretan jaso zituen. Ordurarte belaunaldiz belaunaldi belarriz transmititu ziren doinuak lehenengoz partituretan jasota gelditu ziren. Bost urte beranduago Ebaristo Elduayen txistularia Plazaolako trenak harrapatuta hil zen. Antzezlanean, txistuaren eta Leitzako musika doinuen transmisioa eta herritarren elkartasuna nabarmendu zituzten. Horrekin batera, hainbatetan isilpean gorde izan den historiaren zati bat ere ikusarazi zuten: Marikruz Zabaletaren, Ebaristoren alargunaren istorioari tokia eginez.
Proiektua, gidoia eta zuzendari lanak Miel Mari Elosegik egin zituen. Musikaz Leire Retegi arduratu zen, koru zuzendaritzaz Vinaixa Gartzia, dantzaz Miel Olano eta atrezzo arduradunak Okille tailerra eta LHL taldea izan ziren. Leitzako hainbat taldek parte hartu zuten antzezlanean: Xagu antzerki taldeak, Leitzako dantzari eta txistulari taldeak, Jeiki abesbatzak, Leitzako Iñauterietako musika Bandak, LHL taldeak eta Okille tailerrak. Azpimarratu behar da, inklusioaren alde eginez, egoera zaurgarrian dauden pertsonek paper garrantzitsua izan zutela antzezlanean.