Alize Sagardui goizuetarrak (Mendizabalekin) eta Goiuri Zabaleta leitzarrak (Erasunekin) azken fasera sailkatzeko aukerak dituzte
Gauzak estu daude eta posible da igande arratsaldez Bakion jokatuko den azken partida bukatu arte ez ezagutzea hurrengo fasera sailkatuko diren hiru bikoteen izenak. Gogoratu, multzo bakoitzeko bikoterik onenak eta bi multzoetako bigarren onenak lortuko dutela irailaren 6an Artziniegan hasiko den Urrezko ligarako sailkatzea. Asteburu honetan, A multzoko azken jardunaldiak jokatuko dituzte.
Abuztuaren 29an, larunbatean 19:00etan Plentzian hasiko den jaialdiko lehen partidan, Alize Sagardui goizuetarra eta Mendizabal, Arrizabalagaren eta Zabalaren kontra ariko dira eta, bigarrenean, Goiuri Zabaleta leitzarra eta Erasun, Etxegarairen eta Bergararen kontra.
Protagonista berak, baina partidak aldatuta, ariko dira abuztuaren 30ean, igandean 19:00etan Bakion hasiko den jaialdian. Lehen partidan, Alize Sagardui goizuetarra eta Mendizabal, Etxegarairen eta Bergararen kontra ariko dira eta, bigarrenean, Goiuri Zabaleta leitzarra eta Erasun, Arrizabalagaren eta Zabalaren kontra.