Umore Onatik azaldu dutenez 2011n hasi ziren Karmen Bezperako ospakizuna antolatzen: «Juan Antonio Lekuona Salaberriak bultzatu zuen ekimena, garai bateko usadioa berreskuratu nahian. Beraiek umetan sua pizten omen zuten egun honetan eta udalaren laguntza zuzena jaso zuen ekialdi hau aurrera eramateko».
Hasiera hartan, patata tortilla lehiaketa antolatzeko ohitura izaten omen zuten: «Goizuetako Udalaren kontu izaten zen patatak, arrautzak, tipula, olioa... jartzea. Parte hartzaileek izakin hauekin tortilla egin behar zuten. Ondoren afaldu eta afal ostean sua pizten zuten». Tortilla lehiaketak sei urtez iraun zuen, baina geroztik ez da aurrera eraman. Afaria eta sua, ordea, bai. Umore Ona Elkarteak antolatzen du jaialdia gaur egun, udalaren eta Ikastolako Batzordearen laguntzarekin.