Langileen duintasuna eta hezkuntza zerbitzuaren kalitatea bermatzeko neurriak hartzea eskatu dute: «Soldata duinak eskatzen ditugu, ratioen jaitsiera, haur hezkuntzako eskola publiko eta doako sare bat eta hezkuntzaren funtsezko zati gisa egiten dugun lana aitortzea», laburbildu dute plataformako kideek.
Gaur egungo ratioak altuegiak direla ere seinalatu dute eta datuak jarri dituzte mahai gainean: «Legeak Nafarroan 0-1 adin tarteko 8 ume, 1-2 urteko 12 eta 2-3-ko 16 haurrez osatutako taldeak baimentzen ditu. Zifra hauek OCDE-k eta Europar Batasunak gomendatutako zifrak bikoizten dituzte. Taldeak gehienez 0-1 adin tarteko 4 ume, 1-2 urteko 6 eta 2-3-ko 8 haur izan beharko lituzkete». Horrek hezkuntza kalitatean eragina du: «lanerako baldintza prekarioak ditugu eta ez ditugu baliabide nahikoak ikasleen aniztasunari erantzuteko».
Irakasle aitortza
Hezkuntza Departamentuaren aitortza ere eskatzen dute: «irakasle gisa aitor gaitzala. Haur Hezkuntzako bigarren ziklokoen pedagogia eta burokrazia lan bera egiten dugun arren, ez dugu irakasle aitortzarik. Nahiz eta, LOMLOEk 0-3a hezkuntza zikloa dela aitortu».
Argi diote:«Lanbidea errespetatu gabe ez dago hezkuntza kalitaterik. Haurtzaroa ez da zerbitzu bat, erantzukizun bat da». Haur eskoletan bizitza «oso baten oinarria ereiten» dela nabarmendu dute: «haur eskoletan lagundu, sostengatu eta hezi egiten dugu. Hemen loturak sortzen dira, ikaskuntzak eraikitzen dira». Mobilizazioekin bat egin eta greba deialdiarekin bat egiteko eskaera luzatu dute: «Maiatzaren 7, 18:00etan Iruñean eginen den manifestazioan parte hartzeko gonbidapena luzatzen diegu gaur egun haur eskoletako familiak direnei, baita noizbait izan daitezkeenei ere».