Ados Pilota Elkarteak bigarren aldiz antolatutako Etxeko Memoriala txapelketa asteburu honetan abiatu da. Maiatzaren 1ean Altsasun, partida bana irabazi zuten Kukuprakak eta Mitxoletak taldeek. Lau eta erdiaren barreneko partidan Kukuprakak taldeko Leire Oskozek 18-13 irabazi zion Mitxoleta taldeko Naroa Agirreri. Eskuz binakakoan, aldiz, Betegik eta Iturriaga leitzarrak (Mitxoletak) 22-15 irabazi zieten Aranbururi eta Ruiz de Larramendiri (Kukuprakak).
Maiatzaren 2an Agoitzen, berriz, Bitxiloreak taldeak bi partidak irabazi zizkion Eguzkiloreak taldeari. Lau eta erdiaren barrenean, Mendiburuk 18-13 irabazi zion Barrokali eta binakako partidan, berriz, Mujikak eta Arrastiak 22-7 irabazi zieten Gomezi eta Orbegozori.