Endesa enpresak Hernaniko lurretan, baina Aranotik gertu egin nahi duen makroproiektu eolikoa «lotsagabekeria hutsa» dela salatu du behin eta berriz Urumeako Mendiak Bizirik taldeak eta «balio handiko natur eremuak defendatzeko» deia egin du. Bost aerosorgailu jarri nahi dituzte, 200 bat metroko altuerakoak eta 4,99 megawattekoa bakoitza.
«Proiektuarekiko desadostasuna» adierazteko zirrikitu guztiak baliatu nahi ditu Urumeako Mendiak Bizirik taldeak. Helegite herritarra prestatu dute eta sinadura bilketa jarri dute martxan. Babes zabala jaso dutela adierazi dute eta oso eskertuta daude: «apirilaren 13rako 1.815 sinadura bildu ditugu, baina ez dugu konformatu nahi. Apirilaren 24ra arte jasoko dituzte helegiteak». Apirilaren 23an Hernaniko azokan egonen dira eta online bete nahi duenak, dokumentua hemen deskargatu eta umbizirik@gmail.com helbidera noiznahi bidal dezake. Horretaz gain, eskualdean, Goizuetako Amaia kafetegian eta Leitzako Maimur liburu dendan jarri dituzte sinatzeko orriak.