Gaminderekin bikote eginez 22-18 irabazi zieten Aldairi eta Capellani igandean Etxeberrian
Alize Sagardui eta Gaminde kinka larrian heldu dira Etxebarriara eta partida gogorra irabazi behar izan dute aurrera bizirik jarraitzeko. Aldai-Capellanek asko estutu dituzten arren, azkenerako 22-18 gailendu dira. Eskuetako arazoetatik erabat osatuta, Andrea Capellan indartsu itzuli da kantxetara eta gauzak zail jarri dizkie Sagardui-Gaminderi. Hala ere, Goizuetako aurrelari gaztea eta egungo txapelduna gora egiten ari dira nabarmen, gero eta hobe ulertzen dute elkar eta oraindik ez dute azken hitza esan.
Asteasun, Ibarrola-Erasunek azkenerako nahi baino gehiago sufritu dute hirugarren postuan sendotu dituen hirugarren puntua eskuratzeko. Zizurkilgo atzelariak bikotearen zama bizkar gainean hartuta, partida osoa aurretik eman dute eta 21-9 ere aurreratu dira Ruiz de Infante-Mendizabalen aurka. Urdinek, orduan, berpizte bat izan dute eta 21-16 ere gerturatu dira, baina buelta eman ahal izateko desabantaila handiegia pilatua zuten eta azkenerako amore eman behar izan dute.
Dunixe Alberro garaile
Elite mailakoak ez ezik, promesa mailako pilotariak ere aritu ziren, Etxeberrian nahiz Asteasun. Eskualdeko pilotariei dagokienez, Iturengo Dunixe Alberro aritu zen Asteasun eta Intza Arrutirekin batera, 18-8 irabazi zieten Maria Balerdiri eta Itsasne Lizarralderi.
