Imanolek eta Ainhoak eraman dute azken hamazazpi urtetan Kontzejuko tabernako martxa, baina azaro erdialdean uztea erabaki zuten. Beharrezkoak ziren egokitzapen lanak egin ondotik, Aranoko Udalak lehiaketa publikoa jarri du martxan.
Interesa dutenek, otsailaren 25eko 12:30ak arte, izanen dute proposamenak aurkezteko aukera. Aranoko udaletxean aurkeztu behar da dokumentazioa, eta bertan emanen dituzte lehiaketari buruzko xehetasun guztiak.
Kontzeju taberna eta eraikineko bigarren solairuko etxebizitza ere emanen du Udalak errentan eta barne hartuko ditu tabernaren atariko terraza portxearekin, beheko terrazaren zati bat, biltegia eta tabernako zein etxebizitzako altzariak. Tabernak 55-60 lagunentzako tokia dauka barruan. Hasieran urtebeterako kontratua izanen da, baina hori bukatutakoan, bi aldeak ados badaude, beste lau urterako luzatuko lukete.