[OLERKIA] Neguaren atarian

NEGUAREN ATARIAN

Kristalean apal lurruna
zirrikituak bi begi
lanbro, laino, ilun gauean
behatzak busti ditut
mihise hotz ureztatuan
zure argiaren bila

Oihartzunak iradoki haizeari
urrunera eramandakoen jakin-gosez
haizeak hots pareta lizunean
zaharkitutako zurak ametsik ez
armiarmak brodatu du
bere zetazko amarauna

Egur hezeak sua motel
suaren galdak itzala
hotzikaraz norbait
orpoetatik gora dardarka
nire bakardadea izanen da
nire bakardadearen itzala

Musu-muinka eguna eta argia,
amoros,
ilunak saihestu ez ditzan
inork ez du leku-denbora galdu nahi
ekitateak arrasto zuzena oraindik 
neguko solstizioan

Gauak eskua eman zion egunari
eta ilunak oinak eskaini zizkion argiari
bere orbel bidean pausatu zedin