Abenduaren 5ean, ostiralean, aurkeztuko du Altzadi Leitzako Kultur Elkarteak Orantzaroa, ilunbetik argitara liburua. Urteak daramatzate ALKEkoek Leitzako ondarea zaindu eta biziberritzeko lanean eta proiektu honekin belaunaldien arteko transmisioa bermatu nahi izan dute. Adinekoen testigantzei forma eman, haurrentzako egokitu eta hitzak eta marrazkiak josiz, negutik udaberrira arteko bidea egin dute.
Euskaraz argitaratu dute ipuina, baina herriko kultur aniztasuna kontuan izan eta QR eta esteka baten bidez, ipuina Leitzako ama hizkuntza ezberdinetara itzuli dute: kitxuara, urdura, arabierara, errumanierara, gaztelerara, frantsesera, ingelesera edota zeinu hizkuntzara.
Liburua salgai ere jarri dute Maimur eta Astiz liburu dendetan, hamabi euroren truke eta Durango azokan Nabarralderen postuan ere eskuragarri egonen da.
