Euskararen Egunaren bueltan, Pantailak Euskaraz taldeak sortutako Urak eginen du bide dokumentala ikusteko aukera izanen da abenduaren 2an. Tximutxe Euskara Taldeak antolatu du hitzordua eta emanaldia 18:00etan hasiko da Leitzako Herri Aretoan.
Dokumentalak, adituen eta pertsona ezagunen elkarrizketa eta testigantzen bidez, gaur egun euskarak ikus-entzunezkoen munduan duen egoera aztertzen du. Hiru helburu nagusi ditu dokumentalak: digitalizazio garai honetan euskarazko ikus-entzunezkoen egoeraren berri ematea, egoera horrek gizartearen hizkuntza ohituretan duen eragina aztertzea, eta, azkenik, herritarren kontzientzia aktibatzea euskarazko ikus-entzunezko edukien kontsumoa sustatzeko.
Dokumentalaren ondotik, Xumar Altzugarai Pantailak Euskaraz taldeko kideak solasaldia eskainiko du. Pantailetan euskaraz kontsumitu ahal izateko baliabide praktikoak eskainiko ditu.