Ikasteko, irakurtzeko, lan egiteko eta elkartzeko tokirik ez zutela ikusita, Goizuetako Udalera jo zuten irtenbide bila zenbait herritarrek. Udalak, Cederna Garalurren bitartekaritzarekin, PDR dirulaguntza eskuratu eta Goinarri izan da emaitza: haur, gazte zein helduentzako topagune bizia.
Topagune hitza nabarmendu dute: «bakoitzaren jakintza eta ezagutzak partekatzeko, ideiak gurutzatzeko eta proiektu konpartituak aurrera eramateko gunea izatea nahiko genuke». Ez hori bakarrik: «herriak duen kultura eta historia aberatsa belaunaldiz belaunaldi transmititzeko eta herriaren izena harrotasunez zabaltzeko espazioa» izatea ere bada asmoa.