Urriaren 4an Ireber mendian elkartu ziren, Leitzatik, Aldatzetik eta Beruetetik abiatu eta gero
Basaburutik, 17 gazte bildu ziren Berueteko plazan. Oringo Iturrian kotxeak aparkatu, bertako ur freskoz hornitu eta 11:00etan ekin zioten mendi martxari. Araitz-Beteluko eta Larraungo 16 gazte Aldatzeko plazan elkartu ziren eta 10:30ean hasi zuten ibilaldia. Azkenik, Leitzako 14 gazte 09:00etan Leitzako Torrea ostatuan geratu ziren, azken xehetasunak zehaztu, ur kantinplorak bete eta urrunean ikusten zen Ireber mendia igotzen hasi ziren.
Hiru tokietako gazteak eguerdian elkartu ziren gailurrean. Bertan, norberak bere hamaiketakoa atera eta bista ederrez gozatzeko aukera izan zuten. “Euskara Gazteon Gailur” lemapean argazki bat atera zuten
Bazkaria Uitziko Merkualde elkartean
Mendi martxa bukatzeko, Uitziko Merkualde elkartean egindako bazkarian 42 gazte bildu ziren eta bazkalondoan, bingoa izan zuten.
Martxaren helburua, «eskualdeko gazteak euskararekiko dugun maitasuna eta konpromisoa» erakustea zen, baita «euskarak berarekin dakarren herria eta kultura errespetatu eta zaintzearena. Finean, euskarak egiten baikaitu herri. Ireberreko gailurra euskaraz estaltzea lortu genuen gazteok, eta bertatik eskualde eta herri guztietako txokoak euskararekin bustitzeko».
Amaitzeko, Kattalin Lizarraga leitzarrak, bazkari bukaeran, bertso ederra kantatu zuen, Iparragirre abila dela doinuan.
Etzen sinplea goizeko plana
eta hala ere hara!
Uste nittunak baino gehiago
hurbildu gara bertara,
Eta diot lehenbailen,
ze iruitzen beste baten,
berriz elkartzen bagara
beste hamaika gailurretatik
zabal dezagun euskara.