Prozesua diagnostiko fase batekin hasi zen, eta lehen urratsa izan zen langileak ezagutu eta eguneroko lanean euskararen kudeaketa zer den eta nola egiten den ezagutzea. Ondoren, barne harremanetan euskara gehiago erabiltzeko prozesua abiatu zen, osasun etxeko langileek ulertzen baitzuten herritarrekin gehiago erabiltzeko aukera izango zutela baldin eta barne mailan ere erabilera indartzen bazuten. Tarte honetan, langile guztien ahozko komunikazioa aztertu eta hizkuntza konpromisoak hartu zituzten, bakoitzak bereak. Hilabete gutxiren buruan, euskararen erabilera % 64 izatetik % 86 izatera igo zen.
Ahozko komunikazioa ez ezik, idatzizkoa ere landu dute prozesu honetan, berariaz neurtu baita langileek herritarrei emandako idatzizko informazioaren hizkuntza. Datuak baliatu dira gehien erabiltzen diren dokumentuak berrikusi eta neurriak hartzeko.
Guztira, Leitzako osasun etxean 14 profesionalek hartu dute parte neurketetan eta aurrez aurreko bileretan. Proiektuaren sustatzaileek balorazio positiboa egin dute: «Irribarre batekin eman diote amaiera prozesuari, Leitzako osasun etxean euskaraz lan egiteko eta arreta euskaraz jasotzeko aukerak zabaldu direnaren esperantzaz».
Leitzako esperientzia eredugarria izan da, osasun langileak, Leitzako Udala, Nafarroako Iparraldeko Euskara Mankomunitatea, Osasunbidea eta Euskarabidea bildu dituelako norabide berean lanean. Egindako bidea baliatuta, gainera, dinamika hau beste osasun etxe batzuetara zabaltzen ari dira Osasunbidea eta Euskarabidea une honetan, Elhuyarren laguntza teknikoarekin batera.