Goiuri Zabaleta leitzarra txapelari eusten saiatuko da, ostiralean Ataunen hasi eta abenduaren 21ean Gernika-Lumoko finalarekin bukatuko den lau eta erdiko txapelketan
Maila nagusiari dagokionez, inoizko txapelketarik irekiena izan daiteke aurtengoa. Egungo txapelduna izaki, Goiuri Zabaleta leitzarra agertzen da guztien buru, baina aurkari asko eta kalitate handikoei egin beharko die aurre txapela defendatu nahi badu. Oraintxe min hartuta egon arren, hiru txapel dituen Amaia Aldai txapelketarako prest egongo da. Olatz Arrizabalagak, binaka txapelik gehien dituen pilotariak, ez dio finala herrian jokatzearen aukerari ihes egiten utzi nahi izango bakarkako bere palmaresa estreinatzeko. Plazandreak saioko kaiolako txapela jantzita, Itxaso Erasunek kontuan hartzeko pilotaria dela erakutsi du udan. Lesio larritik osatu den Laia Salsamendik galdutako denbora berreskuratu nahiko du. Binaka atzean diferentzia handiak egin eta gero, Enara Gamindek buruz buru ere bikain moldatu daitekeela erakutsi nahi dio bere buruari. Arrillaga beti da goran egoteko hautagaia… Esandakoa, aurten lehen mailako partida guztiek izango dituzte interes gune ugari. Gainera, gizonezkoen profesionalen txapelketarekin paraleloan jokatuko da emakumezkoen elite mailako lau eta erdiko banakako txapelketa hau.
Baina Emakume Master Cupeko txapelketa honetako hiru mailatan banatuta (gazteak, promesak eta eliteak, hirurak ere pilota mistoarekin), 60 pilotari ariko dira, hamar herritan.
Hamar herritan
Baldintza hauekin, antolakuntzak dagoeneko prest du Gernikan amaituko den abentura honen ibilbide-orria eta, iazko rankinga kontuan hartuta osatutako txapelketan hamar izango dira bisitatuko diren herriak. Txapelketaren azken txanpa aurten Bizkaian jokatuko da, finalerdiak Basaurin jokatuko baitira abenduaren 7an eta finalak, abenduaren 21ean, Gernika-Lumon.