Guztiok eta guztiontzat elkarlanean zioen 2zi Elkarteak egunerako aukeratuko leloak eta, beste behin ere, erantzun zabala izan zuen egindako deiak. Goizean, 09:30ean, egina zuten hitzordua Leitzako plazan eta aterpe bila, karrapean elkartu ziren denak. Txalaparta doinuen ondotik, Navarrabiomed-eko ikertzaile batek hartu zuen hitza eta orain arte 2zi Elkarteak egindako ekarpenekin egin dituzten aurrerapausoak azaldu zituen. 10:00 aldera hasi zen ibilaldia eta euriaren eta bidean zegoen lokatzaren ondorioz, ibilbide motza egin zuten denek.
Eguerdian, Ituren eta Zubietako joaldunek hartu zuten plaza eta joareak gogotik astindu zituzten, gaitza urrutira bidali nahian. Herriko kaleetan zabaldu zituzten joare soinuak eta gero, Leitzako fanfarrearen txanda izan zen. Gitarra, dultzaina, txistu, tronpeta, akordeoi eta Jeiki abesbatzako kideen ahotsek goxatu zuten bazkalordura arteko tartea. Eskolako jangelan kantu bazkaria izan zuten gero. 250 lagunentzako paella prestatu zuten boluntarioek eta kanturik eta konturik ez zen falta izan Angel Mariezkurrena, Uxue eta Aitor Ibarra, Jaione, Jon, Aratz, Intzara, Arhane, Nahikari eta Beñat Mitxelenaren eskutik.