Abuztuko aurreneko asteburuan pestarako lehenbiziko txispa piztuta, abuztuaren 9an lehertu zen pesta Leitzan Gazteen Egunarekin. Joxerra Intxaustik bota zuen biharamunean festetako txupinazoa eta udaletxeko balkoian bere aldamenean izan zituen aurtengo beste bi hautagaiak: Goiuri Zabaleta eta Maria Pilar Artola. Abuztuaren 11n, ezpata dantzarekin leporaino bete zen beste urte batez Leitzako plaza eta bertan izan ziren aurten omendu zituzten bi gonbidatu bereziak ere: Pirritx eta Porrotx pailazoak.
Abuztuaren 9tik 15era, zazpi egunez, ibili ziren leitzarrak pestetan eta tenperatura bezain beroa izan zen kalean sortutako giroa: kantu bazkaria, Leitzako konpartsaren eta Incansables txarangaren kalejirak, herri kirolak, pilota partidak, bertsolariak, gauetako dantzaldiak... plaza beteta, irudi ederrak utzi zituzten eguneko zein gaueko ekitaldiek.