Saltsa eta ikusmin ederra piztu du Aresoko frontenis txapelketa mistoak. Hiru kategoriatan banatuta, kanporaketa fasea jokatu dute 21 bikotek eta finalista guztien izenak jakiteko gutxi falta da. Haurren kategoriako lau finalistak zehaztuta daude: Irai eta Olaia, Telmo eta Arhaneren aurka ariko dira. Gazteen artean, finalerdietako lehia bizi-bizi dago eta helduetan, Unai eta Naiara Onsalo anai-arrebek jokatuko dute finala.
Ekainaren 18an, Gorka eta Uxueren aurkako partida irabazita, lortu zuten finalerako txartela Unai eta Naiara Onsalok. Bigarren bikote finalista, Olatzek eta Aritzek edo Anartzek eta Olaiak osatuko dute.
Gazteen mailan, Nereak eta Odeik, Eunate eta Andoniren aurkako partidan jokatuko dute finalerako txartela eta Haizeak eta Ibaik, Andrea eta Aimar izango dituzte aurkari.
Hiru kategorietako finalak, abuztuaren 14an jokatuko dituzte 12:00etatik aurrera.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.