Maiatzaren 17an goizeko bederatzietan abiatu ziren Goizuetako plazatik lasterkariak. 25 kilometroko ibilbidea eta 10 kilometrokoa zituzten aukeran eta elkarrekin egin zituzten denek Espideko soroa zeharkatu arteko kilometroak. Ibilbide laburra egin zuten lasterkariek helmugarako bidea hartu zuten hor. Helmuga zapaltzen lehenbizikoa izan zen Eneko Morales Belza tolosarra. 53 minutu eta hiru segundo behar izan zituen hamar kilometroko ibilbidea osatzeko. Bere atzetik, bi minutu eta hamahiru segundora ailegatu zen Oier Mikelarena Ariztegi iturendarra. Eneko Mariño Apeztegia donostiarrak osatu zuen podiuma, 55 minutu eta 42 segundoko denborarekin. Emakumezkoetan, Akitaniako Lembeye herriko Marie Charlotte Iratzoquy izan zen irabazlea, ordubete, bi minutu eta 27 segundoko denborarekin. Bere atzetik, Ainhoa Arruti Loyarte urnietarra (ordubete, zazpi minutu eta hamahiru segundo) eta Villabonako Aroa Arteaga Cotelo ailegatu ziren helmugara (ordubete, bederatzi minutu eta 44 segundo). Ikusi hemen ibilbide laburreko sailkapen osoa.
Ibilbide luzeko lasterkariek beste horrenbeste zuten aurretik. Espideko sorotik aurrera segi eta Amonamotza, Loitzate eta Arainburuko tontorretara igo ziren. Gero, Bentzuntzaraino segi eta Elamara jaitsi ziren, igoera txiki bat egin eta Arriurdiñetako gaina zapaldu eta Espideko sororaino igo ondotik, helmugara ailegatu ziren. Aurtengoan, Hernanira joan zen garaipena. Ander Amonarriz Zubiondok 25 segundoko aldea atera zion bigarren postuan bukatu zuen Hodei Lujanbio Apezetxea goizuetarrari. Iñaki Olano Orbegozo altzotarrak osatu zuen podiuma, bi ordu, hamaika minutu eta 44 segundoko denboran. Ikusi hemen ibilbide luzeko sailkapen osoa.