Maiatzaren 10ean, 11:00etan egina zuten hitzordua Frankiko Zazpizubietan leitzarrek eta berastegiarrek. Nafarroa eta Gipuzkoaren arteko mugan bat egin zuten bi herriek. Bertara oinez zein bizikletaz hurbildu ziren eta trikitilari eta txistulariei esker, ez zen musikarik falta izan.
Dabid Anaut Leitzako alkateak eta Andoni Zuriarrain Berastegiko alkateak manifestua irakurri eta opariak trukatu zituzten. Leitzarrek Okille tailerrekoek egindako eguzkilorea eman zieten auzoko herrikoei opari eta berastegiarrek trukean gazta eta artzaintzari buruz herrian osatu duten liburua. Joanes Illarregi eta Iñigo Gorostarzu Etxeorde aritu ziren bertsotan. Taldeko argazkia atera eta hamaiketa ere egin zuten bakoitza bere herrira bueltatu aurretik.