Leitzako Herri Krosa, 16:30ean hasiko da. Benjamin mailakoak, 2021 eta 2014 artean jaiotakoak, izanen dira lehenbizikoak eta 800 metro egin beharko dituzte lasterka. Segidan, gaztetxoen txanda izanen da, 2013 eta 2009 artean jaiotakoena, eta bi kilometro eta erdiko ibilbidea osatu beharko dute. Bukatzeko, maila absolutukoen txanda izanen da. Hauek bi luzera izanen dituzte aukeran: bost kilometro edo hamar kilometroko itzuliak.
Benjamin eta gaztetxoen mailako izena ematea dohainik izanen da. Helduek Internet bidez egin dezakete izena ematea www.kronoak.com helbidean. Aurrerako bazkide direnek hamar euro eta bazkideak ez direnek hamabi euro ordaindu beharko dituzte. Egunean bertan ere izanen da izena emateko aukera, 15:30etik 17:00etara, Aurrera Elkartean. Azken orduan izena ematea erabakitzen dutenek zertxobait gehiago ordaindu beharko dute: hamabost euro Aurrerako bazkideak ez direnek eta hamabi euro bazkideek.
Krosaren osagarri
Aurten, iluntze partean hainbat berrikuntza izanen direla jakinarazi dute antolatzaileek. Aurrerako taberna 18:00etan irekiko dute eta sari banaketa 19:15ean eginen dute plazan. 19:30etik aurrera, food truck jarriko dute Labetxeko atarian eta 23:00etatik aurrera, Oixani DJ ariko da Aurrera Elkartean.