Gure Zirkua omenduko dute: «amestutako plaza izatetik ametsetako plaza izatera iritsi den egitasmoa». Balioan jarri nahi izan dute egiten duten lana: «eredugarria eta ikusgarria da euskaratik eta euskaraz denon gorputzak inarrosteko erakusten duen gaitasuna. Euskaratik eta euskaraz, baina hizkuntza unibertsala tresna gisa baliatuz: emozioa, ikusmina eta umorea».
Gure Zirkua zerbait bada, familia da, komunitatea, auzolana: «garaiko balio kapitalistetatik eta indibidualistetatik urrun, utopian sinetsita eraikitako talde proiektua: zirkua egiten dutenetatik hasi eta ikusle hurbiltzen garenon artean gorpuzten den herri-egitasmoa».
Hain proiektu ezberdinak izanik ere, hortxe egiten dute bat Gure Zirkuaren eta EHMEren balio garrantzitsuenek: «euskara, lurraldetasuna, auzolana… eta kirola. Sinetsita gaude txikitik eraginez amets handiak gauza litezkeela».