Espainiako klub arteko pilota txapelketako ohorezko mailan jokatzen ari dira Umore Onako pilotariak. Otsailaren 2an herrian jokatu eta ikusleen babesa izanagatik, ezin izan zituzten bi garaipenak erdietsi Urbiongo pilotarien aurka. Buruz buruzkoan Umore Onako Eñaut Lizeagak mendean hartu zuen Iker Egiguren, baina binaka ez zuten zorte bera izan. Beñat eta Antton Apezetxeak 1 eta 2 galdu zuten Beñat Azketa eta Aingeru Bernaolaren aurka.
Buruz burukoan lehenbiziko jokoan estu ibili zen markagailua eta 10-7 irabazi zuen azkenean Lizeagak. Bigarren jokoan, berriz, erraz gailendu zen goizuetarra, 10-2 irabazita.
Binakakoak, lehenbiziko eta hirugarren jokoak galdu egin zituzten Apezetxeatarrek (5-10 eta 1-5). Bigarren jokoa, kostata izan bazen ere, irabaztea lortu zuten (10-8).
Sailkapen orokorrean, bederatzigarren postuan dago Umore Ona, 10 punturekin. Asteburu honetan San Cosmeren aurka ariko dira lehian, Errioxan.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.