Mendialdea Mankomunitateak eta Zaindu Leitzaldeak elkarlanean eman diote forma proiektuari. Udazkenean hasi ziren arropa eta osagarriak biltzen eta Zaindu Leitzaldea elkarteko boluntarioak izan dira saltzera atera aurretik, guztia sailkatu, garbitu eta txukundu dutenak. Haur, gazte zein helduentzako arropa eta osagarri ugari dituzte prest eta edonor joan daiteke bertara erostera. Salneurriei dagokienez, merkeenak hiru eurotan eta garestienak hogei eurotan jarri dituzte salgai.
Ekimen honekin bigarren eskuko merkatu bat sortu, beraien proiektua finantzatu, ekonomia zirkularra bultzatu eta kontsumo eredu berriak sustatu nahi dituzte. Orain materiala salmentara atera duten arren, arropa eta osagarriak biltzen segitzen dutela ere argitu nahi izan dute: «etxean soberan dutena ekar dezatela gurera».
