Haur eta gaztetxoei zuzendutako Robotia filma emanen dute 17:00etan. Euskaraz eskainiko dute eta sarrerak internet bidez lau eurotan edo egunean bertan, leihatilan eskura daitezke bost euroren truke. Androideek mendean hartutako mundu batean, futbolean jokatzearekin amets egiten duen neska baten istorioa kontatzen du filmak. Familiak debekatu dion arren, lagunek haren nahia betetzen lagunduko diote, eta elkarrekin, futbol-zelai barruan zein kanpoan egiteko gai direna erakutsiko diete guztiei.
Iluntzean, 19:30ean, Ridley Scott zuzendariaren Gladiator II filma ikusteko aukera izanen da. 2000. urtean kaleratutako Gladiator film arrakastatsuaren segida da. Sona handiko aktoreek parte hartzen dute bertan; besteak beste, Paul Mescalek, Pedro Pascalek, Joseph Quinnek eta Denzel Washingonek. Iluntzeko saiorako sarrerak aldez aurretik bost eurotan eros daitezke edo emanaldia hasi baino ordu erdi lehenago sei eurotan.