Ogi zerbitzua martxan jarri nahi dute Areson azarotik aurrera

Hainbat buruhauste sortu ditu azken hilabeteetan Areson ogi zerbitzurik ez izateak, baina badirudi topatu dutela irtenbidea. Leitzako Zortziko Labetxearekin akordioa egin dute eta prest dago egunero Aresora ogia eramateko. Goizeko zazpietan utziko du ogia udaletxe ondoko portalean eta norberak joan beharko du bere ogiaren bila. Zerbitzua martxan jartzeko gutxieneko eskaera bat izatea beharrezkoa denez, herritarren artean galdetegi bat banatu dute. Hiru ogi mota izango dituzte aukeran: normala, baserrikoa eta integrala gatzarekin. Ogia eskatu nahi dutenek eskaera orria bete beharko dute urriaren 25a baino lehen eta udaletxean utzi edo areso@areso.eus helbidera bidali. Ogia hilabete bukaeran kobratuko zaio bezero bakoitzari eta formularioan ere kontu korronte zenbakia adierazi beharko dute.