Asteazkenean, Iruñeko Laban, Mutilatuak eta EzKrashak taldea aritu ziren nor baino nor eta eskualdekoek lortu zuten garaipena eta finalaurrekoetarako txartela.
Ortziralean, Leitzan, Manteleko Sobrak eta Drimtim aritu ziren lehian eta etxeko taldea nagusitu zen. Leitzako Eki Mateorena eta Kattalin Lizarraga bertsolariak aritu ziren kantari Manteleko Sobrak taldean, Ekai Alegre altsasuarrarekin batera. Gai jartzaile lanetan, aldiz, Miel Mari Elosegi Luze aritu zen. 80 lagun inguru bildu ziren Atekabeltz gaztetxean eta giro ederrean jokatu zuten saioa. Manteleko Sobrak taldeak ere bigarren fasera sailkatzea lortu du.
Egun berean jokatu zuten Erronkarin Baztanzopak eta Errimaren Matxinatuak taldeen arteko lehia eta baztandarrak nagusitu ziren. Atarrabian, aldiz, Argako Bixiguak eta Malerreka ez da Baztan taldeen arteko saioa egin zuten. Argako Bixiguak taldeak irabazi zuen saioa, baina berdinketa izan zen hurrengo faserako sailkapenean. Desenpaterako irizpideak aztertuta, Argako Bixiguak taldeak lortu du hurrengo faserako sailkapena, eta beraz, Malerrekako taldea lehiatik kanpo gelditu da.
Eskualdeko taldeen azken saioa, aldiz, Erratzuko Elkartean jokatu zuten larunbatean. Baztango Baztanzopak eta Bortzirietako Hor Gu! taldeak aritu ziren. Azkenerako, Baztanzopak irabazi zuen saioa eta beraz, zuzenean lortu zuen finalaurrekoetarako txartela. Hor Gu! taldeak ere hurrengo faserako txartela lortu du, A, B, C eta D multzoetako bigarren sailkatu onena izan baita.
Finalaurrekoak hurrengo bi asteburuetan
Urriko lehen bi asteburuetan jokatuko dituzte finalaurrekoak. Hiru kanporaketa izanen dira finalaurrekoetan, joan-itzuliko formatuan.
Ortziralean, urriaren 4an, Irurtzunen Argako Bixiguak eta Mutilatuak ariko dira; Iruñean Hor Gu! eta EzKrashak eta Tafallan Manteleko Sobrak eta Baztanzopak. Itzulerako saioak, aldiz, urriaren 12an jokatuko dituzte. Etxaurin Argako Bixiguak eta Mutilauak ariko dira, Irunberrin Manteleko Sobrak eta Baztanzopak eta Tuteran Hor Gu! eta Ezkrashak.
Finala, aldiz, Garesen jokatuko dute urriaren 26an eta finalaurreko bakoitzeko irabazlea ariko da kantuan, hiru talde, beraz.