Azken orduko euri jasek hasieran zituzten asmoak aldarazi eta jokoak herri osoan banatu beharrean pilota plazan, eskolako aterpean eta garbilekuan egin behar izan zituzten. Zein baino zein proposamen bereziagoa, ttikienek ez zuten nabaritu aldea. Puxika eta basoa batetik bestera eramanez, zapi jokoan, aurpegia margotuz, zapoak arrantzatzen, uztaia elkarri pasaz... jolasean ibili ziren bazkalordura arte.
Bazkarian 150 lagun elkartu ziren eta tripa goxatuta, arratsaldean kalejiran atera ziren. Herri ttikietan ikasi eta bizi zioten pankartak aurrealdean eta Irumaita txarangakoen erritmora egin zuten herrian itzulia. Plazan elkartu ziren gero eta zaku karrera, lokotx biltzea, toka, koloretako zapiarekin edo arrautzak eramanez, giro ederrean ibili ziren.
Txokolate beroa edan eta bizkotxoa janez berreskuratu zituzten indarrak, Goizuetako trikitilarien saioa hasi aurretik. Bukaeran, lekukoa eman zieten Goizuetako gurasoek Leitzako gurasoei. Beraiena izanen da heldu den urtean topaketak antolatzeko ardura.