Leitzako plazan, 09:00etan, izanen da irteera eta 15:00etan toki berean izanen du helmuga. Dortsalak, berriz, proba egunean, 07:30etik 08:45era hartu ahal izanen dira, izena emateko orriaren egiaztagiria aurkeztuta.
Iaz bezalaxe, antolatzaileek probaren hasierako tartea arautuko dute, martxa neutralizatu gisara; hasieran herriko hainbat kale zeharkatuko dituztelako eginen dute horrela.
Gainerakoan, ibilbidean bi kontrolgune jarriko dituzte, lehenbiziko bi anoa guneekin bat eginez. Aurrenekoa Basakabin, ibilbidearen 17,5. kilometroan eta hortik pasatzeko ordu muga 12:00etan ezarri dute. Bigarren kontrol puntua Uitziko gainean jarriko dute, 34,5. kilometroan. Kasu horretan, pasatzeko ordu muga 13:30ean izanen da. Anoa guneak, berriz, hiru izanen dira, aipatutako tokietan bi eta hirugarrena helmugan.