Erabaki honekin, hizkuntzaren auzia konpondu eta ematen duten pediatria zerbitzua hobetuko dute: zerbitzua astean bitan eta gazteleraz ematetik, egunero eta euskaraz ematera pasako baita.
Bederatzi hilabeteren ondoren, Leitzaldeko gurasoen eta udalen eskaerei, erantzuna eman die Nafarroako Gobernuak. Ez da ahaztu behar, urtarrilean pediatrarik gabe gelditu eta bost hilabetez, ez zutela ordezkorik bidali. Egoera salatu eta irtenbideak eskatzeko, Leitzaldean pediatra orain taldea sortu zuten orduan eta hainbat mobilizazio egin zituzten. Zartaginak eskuetan hartuta batzuetan, maskara zurien edo koloretako pankarten atzean, besteetan. Maiatzaren 16an berrezarri zuten zerbitzua, baina astean bi egunetara mugatuz. Gainera, bidalitako pediatrak ez zekien euskaraz. Orain, badirudi, behingoagatik Leitzaldeko pediatraren auziak baduela neurriko irtenbidea.