Irailaren 8an, Talo Egunaren hemeretzigarren edizioa ospatuko dute Leitzan. Urtero bezala, taloak jateko eta egiten ikasteko aukera izanen da eta herri kirol erakustaldirik ere ez da faltako. Gainera, iaz bezala, Mendialdeko Azoka Ibiltariarekin bat eginen du hitzorduak eta eskualdean ekoizten dituzten elikagaiak eta artisauen lanak erosteko aukera izanen dute bisitariek.
Goizean, 10:30 aldera irekiko dituzte talogileen postuak eta ordu erdi beranduago hasiko da Mendialdeko Azoka Ibiltaria. Karrapean, berriz, taloak egiten ikasteko aukera izanen du nahi duen orok. 12:30ean herri kirolaren txanda izanen da. Nerea Arruti gipuzkoarrak aizkora erakustaldia eskainiko du. Tartean, bi metrotik gorako perimetroa duten enborrak moztuko ditu. Arratsaldean, 17:00, Gazteluko sega eskolakoek erakustaldia eskainiko dute Plazaolako geltoki ondoko belatsoan.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.