Iraileko lehenbiziko igandean, mendizalez beteko dira Aresoko kaskoak. Hamabosgarren edizioa beteko du herritarrek urtero mimoz eta auzolanean antolatzen duten mendi martxak. Mendizaleek 23 kilometroko ibilbidea osatu beharko dute eta bukaeran, hainbeste eskertzen duten paella jateko aukera ere izanen dute.
Aresoko plazatik abiatuko da mendi martxa eta Ulimendiko bidea hartuko dute Ulizarko gainera ailegatu aurretik. Handik aurrera Merkuzelai, Urkita, Pagozelai eta Guratzetik pasa beharko dute mendizaleek. Proba ez da lehiakorra izanen eta antolatzaileek zailtasun ertainekoa dela adierazi dute.