Berrikuntzak eta egutegian txapelketa gehiago iragarri zituen Emakume Master Cup zirkuituak bere denboraldi hasieran eta, udako egutegira erabat indarberrituta itzultzen den Plazandreak Txapelketa da horietako bat. Bost astez ETB-1eko astelehenetako prime-timea beteko duen txapelketa taldeka jokatuko den lehiaketa bat izanen da, talde bakoitzeko pilotariek binaka eta lau eta erdian jokatu beharko dute, eta garaipen bakoitzeko puntu bat eskuratuko dute. Txapelketa uztailaren 1ean hasiko da eta ligaxkan punturik gehien batzen dituzten bi bikoteek abuztuaren 5eko final handia jokatuko dute. Goiuri Zabaleta leitzarra izanen da txapelketan parte hartuko duen pilotari bakarra.
Denera lau taldetan banatutako goi mailako hamabi pilotari arituko dira txapelketa honetan; Arrizabalaga-Capellan eta Ibarrola; Aldai-Mendizabal eta Larrarte; Zabaleta-Gaminde eta Etxegarai eta Garai-Galeano eta Arrillaga.
Eta protagonistak primerakoak badira, zer esan txapelketako jaialdi guztiak hartuko dituen pilotalekuaz, Bilboko bihotzean, Zazpi Kaleetan eraiki berri duten Esperantza frontoia, emakumeen esku pilotan erreferentziazko pilotalekua izatera datorren kantxa berria, lehiaketa honetan estreinatuko dena.
Txapelketan parte hartuko duten pilotariez gain, asteazkenean egindako aurkezpenean Bizkaiko Foru Aldundiko Leixuri Arrizabalaga eta Carlos Sergio Atxotegi, Bilboko Udaleko Itxaso Erroteta eta Marcos Muro, EITBko Joseba Urkiola eta Amane Ibañez eta Laboral Kutxako Alvaro Parro izan ziren, Plazandreak Torneoa babestu eta pilotariak animatzeko.
Egutegia
