'Zopa' hitanoari buruzko antzerkia ikusteko aukera izanen dute igandean Goizuetan

Maiatzaren 26an, 19:00etan, Zopa antzezlana eskainiko dute Goizuetako udaletxeko ganbaran. Segurako Xirikara umorezko antzerki-taldeak iazko Euskararen Egunean estreinatu zuen ikuskizuna. Mirari Martiarena umoregile, gidoilari eta kazetari oiartzuarra arduratu da hitanoa oinarri duen gidoia osatzeaz, eta Idoia Uranga aktore eta zuzendariak gidatu du taldea. Oholtza gainean, Aiora Juantorena, Arantxi Barandiaran, Koldo Alustiza, Olatz Etxeberria, Ekiñe Izagirre, Maider Hernandez eta Luli Telleria aktoreak ariko dira. Sarrera dohainik izanen da.