Udalarentzat lehentasunezko proiektua dela nabarmendu zuen alkateak: «gure esku ditugun bitarteko guztiak erabiltzeko prest gaude». Hala ere, azken erabakia ez da beraiena: «800.000 euro inguruko inbertsioa beharko litzateke belar artifiziala jarri, argiteria aldatu eta aldagelak berritzeko. Diru kantitate handia da eta hori egin ahal izateko ezinbestekoak dira Nafarroako Gobernuaren dirulaguntzak». Oinarrizkoa litzateke, «aurrekontuetan Arkiskilgo proiektuarentzat partida bat zehaztuta egotea».
Momentu honetan, Nafarroako Parlamentuko aurrekontuetako aurreproiektuan ez dute sartu: «dena den, etorkizunean lortu daitekeen zerbait dela uste dugu». Proiektuak herritarren babesa duela bistakoa da, horregatik, orain: «denek norabide berean, presioa egiteko indarrak batuta, lan egiteko garaia da. Iruñean arazoaren neurria zenbatekoa den argi erakusten asmatu behar dela» azaldu zuten. Asko dira landu daitezkeen bideak: sinadura bilketak, Parlamentuan agerraldiak... Udalak eta Aurrerak hitzartuko dute hori nola egin eta herritar guztiei eskatu diete orain arte bezala, egiten diren ekimenetan parte-hartze aktiboa izatea.