Hamar kilometro inguruko ibilbidea osatuko dute. Nahiz eta zailtasun teknikorik ez izan, komenigarria da mendirako zapata egokiak eta hotzerako arropa eramatea, baita jateko zerbait ere.
Eskasetik abiatzen den ibilbide zirkular honek balizatutako bi bide elkartzen ditu. Eskasetik hasita Napar Bidetik abiatuko dira, Burnaiztegi leporaino. Handik Bidango zabalera iritsiko dira eta bertan harrespilak eta historiarreko aztarna batzuk ikusteko aukera izanen dute. Elutsako leporaino hurbilduko dira hamaiketakoa hartzera, tokiak eskaintzen duen Artikutzako basoaren ikuspegiaz gozatzen duten bitartean.
Eskasera itzultzeko beheranzko bidea hartuko dute Elizmendiko bide nagusiarekin topatu arte. Bide honek Erroiarriko ur-jauzia ikusteko parada eskainiko diete eta izen bereko lats ederra ere bai. Egurrezko bi zubitxo zeharkatu eta gero gora eginen dute eta errepidera aterako dira.