Umore Onako Beñat Apezetxea goizuetarra Elgoibarko Lagunak Pilota Elkarteak antolatutako San Anton torneoko Promesa mailan irabazlea izan da, Oiarpeko Unax Landarekin batera. Urtarrilaren 19an, ostiral gauean jokatutako finalean Oier Ibarluzea eta Iker Garziaren kontra 22-11 irabazi zuten.
Elite mailan, aldiz, Umore Onako Antton Apezetxea goizuetarra txapeldun orde izan da, Aurrera Tolosako Josu Igoaren bikote eginez. Finalean ez zuten egunik onena izan eta 6-22 galdu zuten Oberenako Javier Oskoz eta Markel Lizeaga hernaniarraren kontra.
Emakumeen lau eta erdiaren barreneko buruz buruko finala izan zen berdinduena. Goiuri Zabaleta leitzarrak ongi estutu zuen Leire Garai, baina azkenean gasteiztarra 22-15 gailendu zitzaion.