Joan den urtean bigarren mailatik lehenengo mailara igotzea lortu ondotik, Espainiako kluben txapelketan hasia da Goizuetako Umore Ona pilota elkartea. Joan den asteburuan Naxeran aritu ziren Umore Onako pilotariak eta urtarrilaren 21ean, igandean, 18:00etan hasita, Larraunen kontra jokatuko dute.
Buruz buruko partidan, Umore Onako Eñaut Lizeaga, Larraungo Astizen kontra ariko da eta binakako partidan, berriz, Umore Onako Beñat Apezetxea eta Antton Apezetxea, Larraungo Galartza eta Gurrearen kontra.
Naxeran estreinakoa
Aipatu bezala, urtarrilaren 13an, joan den larunbatean Naxeran (Errioxa) jokatu zuen Espainiako lehen mailako kluben txapelketako lehen jardunaldia, CP Najerinoren kontra. Buruz buruko partidan, Umore Onako Eñaut Lizeagak lehenbiziko jokoa galdu arren, bigarrena eta kitarakoa irabazi zuen Najerinoko Hormaetxeren kontra (10-4, 7-10 eta 1-5). Binakako partida, aldiz, bi jokoak galdu zituzten Umore Onako Beñat eta Antton Apezetxeak Najerinoko Prado eta Merino II.a profesional ohiaren kontra (10-4 eta 10-2).