Hitz gutxiko emakumea dela diote bere hurbilekoek Valentinari buruz hitz egiterakoan: «gauza gehiegi konpartitu gabe, dena barruan eramanez, bizitzari aurre egin dion emakumea da. Ez dugu askotan jakin izan berak zer pentsatu izan duen. Hori bai, inorentzat ez du hitz itsusirik izan». Bizimodu gogorra izan duela ere aipatu dute: «beti lanean eta ingurukoei laguntzeko prest egon da. Garai batean baserriz baserri ibiltzen omen zen zerria prestatzen eta artilea errekan garbitzen ere bai».
Lanari ez dio sekula beldurrik izan, baina orokorrean oso pertsona beldurtia izan omen da betidanik: «harrigarria da zeinen beldurtia izan den. Hori bai, bizitzeari ez dio inoiz beldurrik izan». Ez da seinale txarra azkeneko urteetan batere botikarik hartu gabe bizi dela jakitea: «ez du pastilla bakar bat ere hartzen azkeneko urteetan eta apetito ederra du». Urte askoan Valentina!