Datozen orduetan A-15 errepidea ixteko aukera dagoela abisatu dute

Ttipi-Ttapa 2024ko urtarrilaren 10a

A-15 errepidea itxi edo irekitzea momentuko egoeraren arabera erabakiko dute.

Gipuzkoako Foru Aldundiak eman du abisua:«700 metrotik behera elurra dakarren fronte hotza dator eta A-15 errepidea ixteko probabilitatea dago hurrengo orduetan». Berastegi parean, Gorosmendi tunela berritzen ari dira eta bypassa jarria dagoenez elur-makinek ezin dute bertatik igaro. Dena den, argitu dute errepidea ez dela moztuko elurra hasi arte, eta bertan egonen diren errepideko langileek eta trafikoa arautzeaz arduratzen diren agenteek erabakiko dutela ixtea, behar izanez gero. Kasu horretan, Gipuzkoako zatian Andoaingo lotunetik Berastegiko lotunera itxiko lukete, bi norabideetan. Momentuz ez da elurrik eta errepidea irekita dago. Uneoro Autobidea irekita edo itxita dagoen jakin nahi dutenek eskuragarri dute Telegram kanala.

Egoerak txarrera egiten badu, Andoaindik Iruñera doan bidean, Andoainen moztuko dute errepidea. Iruñetik Gipuzkoara doazenen kasuan, berriz, Berastegi pareraino joan ahalko dira autobidetik. Hor ibilgailu arinek GI-2130 errepidea hartzeko aukera izanen dute, baina ibilgailu astunek ez, buelta emanaraziko diete.

Bestalde, Gipuzkoako Diputazioak iragarri duenez, elurragatik A-15 autobidea ixten dutenean, Tolosa eta Leitza lotzen dituen GI-2130 errepidean eta N-1ean mantentze-lanak indartuko dituzte.

Gizartea Leitzaldea

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun